बूढानीलकण्ठ , भाद्र ३० गते । सहिद स्मारक सि-डिभिजन छनौट खेल प्रतियोगितामा भाग लिन लागेको ‘टिम बूढानीलकण्ठ’ ले खेलाडिहरुको प्रशिक्षण तिव्र गतिमा लगेको छ ।
नेपाली फुटबल जगतमा सहिद स्मारक ए-डिभिजन लिग र सहिद स्मारक बि-डिभिजन लिग पछिको तेस्रो दर्जाको राष्ट्रिय फुटबल लिग सहिद स्मारक सि- डिभिजन लिगको क्वालिफायर (Qualifier) मा बूढानीलकण्ठ नगरपालिकाको प्रतिनिधीत्व गर्ने ‘टिम बूढानीलकण्ठ’ ले प्रतियोगितामा प्रतिस्पर्धि समुहको रुपमा चिनिने लक्ष्य राखेको छ ।
नगरपालिकामा २ दशक भन्दा लामो समय देखि खेलकुद क्षेत्रमा सक्रिय शिवपुरी युवा क्लवको संयोजकत्वमा भएको खेलाडि छनौट प्रकृयाबाट २४ जना उत्कृष्ट खेलाडिहरु छनौट गरि उनिहरुको प्रशिक्षण विज्ञ प्रशिक्षकहरुबाट सुरु गराएको थियो ।
संयोजक शिवपुरी क्लबले खेलाडिहरुको प्रशिक्षणमा कुनै पनि कमि कमजोरी हुन नदिने गरी व्यवस्थापनमा लागि परिरहेको जनाएको छ । टिम म्यानेजर कृष्ण थापाका अनुसार खेलाडिहरुको ‘डाईट’, खेल सामाग्रि, ‘बिमा’ ,पारिश्रमिक लगायत खेलाडि प्रशिक्षणमा चाहिने सबै किसिमको सेवाहरु उपलब्ध गराईएको छ ।
खेलाडि प्रशिक्षण टोखा भुतखेल फुटबल मैदानमा बेलुका ०३ बजे देखि नियमित रुपमा संचालन भईरहेको छ ।
नगरपालिका खेलकुद व्यवस्थापन समिति संयोजक तथा वडा नं ०८ अध्यक्ष सुमन तामाङ्ले टोखा मैदानमै उपस्थिति भई खेलाडिहरुको जोस र हौसला बढाईदिनु भएको थियो । यस प्रतियोगितामा नगरपालिकाको प्रतिनिधि टिम भएकोले खेलमा उत्कृष्ठ प्रस्तुति देखाउन सम्पुर्ण खेलाडि तथा संयोजक शिवपुरी युवा क्लबलाई अनुरोध गर्नु भएको छ ।
भाद्र १० गते देखि सुरु भएको यस लिग प्रतियोगितामा नेपालभरका ७५ वटा टिमले भाग लिएका छन् । जस अन्तर्गत ‘टिम बूढानीलकण्ठ’को खेल असोज ०४ गते रहेको छ ।
लाईसेन्स प्राप्त प्रशिक्षक टिकाराम कार्कि र नेपाल आर्म्ड पुलिस फोर्स (ए.पि.एफ) का खेलाडि क्रमश सन्तोष श्रेष्ठ र श्याम नेपालिले खेलाडि प्रशिक्षणमा सहयोग गरिरहेका छन् । प्रशिक्षकहरुको अनुसार खेेलाडीहरुलेे उत्कृष्ट प्रस्तुति देखाईरहेको अवस्थामा टिमको पहिलो खेलबाटनै मेहनतको नतिजा प्रस्तुत हुने विश्वास राखेको बताए ।
टिम बूढानीलकण्ठको व्यवस्थापन समितिमा संयोजक शिवपुरी क्लबको अध्यक्ष सन्देश कार्कि, टिम म्यानेजर कृष्ण थापा लगायत व्यवस्थापन समिति सदस्य क्षितिज खड्का, शेखर खड्का, सविन सापकोटा, मधु कार्कि, लक्ष्मण खड्का रहेका छन् ।
