बुढानीलकण्ठ नगरपालिका, कृषि विकास शाखाले कृषकहरूलाई कृषिमा सहुलियत प्रदान गर्न ५० प्रतिशत अनुदानमा मिनि टिलर वितरण गरेको छ। नगर प्रमुख मिठाराम अधिकारीले कृषकहरुलाई डिजेल र पेट्रोलबाट चल्ने दुई प्रकारका मिनि टिलरहरू वितरण गर्नुभएको हो ।

डिजेलबाट चल्ने १० वटा मिनि टिलर, जसको बजार मूल्य रु. ६५,००० रहेको छ, अनुदानका साथ वितरण गरिएको छ। यसैगरी, पेट्रोलबाट चल्ने ७ वटा मिनि टिलरहरू पनि उपलब्ध गराइएका छन्, जसको बजार मूल्य रु. ४५,००० रहेको छ। नगरपालिकाको यस सहयोगले कृषकहरूलाई खेतीपाती गर्न सजिलो हुने र उत्पादनमा वृद्धि हुने अपेक्षा गरिएको छ।

नगरपालिकाले कृषि यान्त्रीकरणलाई प्रवर्द्धन गर्न र कृषकहरूको उत्पादन क्षमतामा वृद्धि गर्न निरन्तर काम गरिरहेको छ। यस किसिमको अनुदानले स्थानीय कृषकहरूलाई आधुनिक कृषि प्रविधिको प्रयोगतर्फ आकर्षित गर्ने लक्ष्य राखिएको नगर परमुख मिठाराम अधिकारीले बताउनुभयो ।

वितरण कार्यक्रममा प्रमुख प्रशासकीय अधिकृत तुल्सी राम अर्याल, प्रशासकीय अधिकृत महेश पाठक, आर्थिक विकास महाशाखा प्रमुख केदार कुमार खड्का, र कृषि विकास शाखा प्रमुख लक्ष्मी घर्तीको उपस्थिति रहेको थियो।

नगरपालिकाका प्रमुख अधिकारीहरूले कृषकहरूलाई कृषि यन्त्रको प्रयोगबाट लाभ उठाउन प्रेरित गर्दै यस्ता कार्यक्रमहरू आगामी दिनमा पनि जारी राखिने बताएका छन्।