काठमाडौँ — बुढानीलकण्ठ नगरपालिकाको बहुप्रतीक्षित दोस्रो नगर खेलकुद शिल्ड २०८३ आज एक उल्लासमय, भव्य र रंगीन समारोहबीच औपचारिक रूपमा शुभारम्भ भएको छ। खेलकुदप्रेमी, जनप्रतिनिधि तथा स्थानीय बासिन्दाहरूको उल्लेखनीय उपस्थितिले कार्यक्रमलाई अझ जीवन्त बनाएको थियो। कार्यक्रमको सुरुवात आकर्षक र अनुशासित परेड प्रस्तुति बाट गरिएको थियो, जहाँ विभिन्न वडाका खेलाडीहरूले आफ्नो टोलीको प्रतिनिधित्व गर्दै उत्साहपूर्ण प्रदर्शन गरेका थिए। राष्ट्रियता, अनुशासन र खेलभावनाले भरिएको उक्त प्रस्तुति कार्यक्रमको प्रमुख आकर्षणमध्ये एक बनेको थियो।

उद्घाटन समारोहमा खेलकुदसँगै आत्मरक्षा र अनुशासनको सन्देश दिने उद्देश्यले तेईक्वान्डो र मुई थाईका प्रभावशाली कौशल प्रदर्शन प्रस्तुत गरिएको थियो। खेलाडीहरूको कौशल, शक्ति र तालमेलले दर्शकहरूलाई रोमाञ्चित बनाउँदै लामो समयसम्म तालीको गडगडाहट गुञ्जिएको थियो।कार्यक्रमको विशेष क्षणका रूपमा बुढानीलकण्ठ नगरपालिकाकी उप-प्रमुख अनिता लामा र प्रमुख प्रशासकिय अधिकृत अजय बर्तौलाले नगर शिल्ड अंकित बेलुन आकाशमा उडाएर प्रतियोगिताको औपचारिक उद्घाटन गरेका थिए। रंगीन बलुनहरू आकाशमा उड्दै गर्दा खेलकुदको आत्मा—उत्साह, आशा र एकताको प्रतीक झल्किएको थियो, जसले सम्पूर्ण वातावरणलाई अझ प्रेरणादायी बनाएको थियो।

उद्घाटन समारोहमा नगरपालिकाका १ देखि १३ वटै वडाका जनप्रतिनिधिहरूको सक्रिय सहभागिता रहेको थियो। उनीहरूको उपस्थिति र समर्थनले खेलकुदमार्फत सामाजिक एकता, सहकार्य र स्वस्थ प्रतिस्पर्धाको भावना अभिवृद्धि गर्ने सन्देश दिएको छ।उद्घाटन दिनमै सम्पन्न सेभेन–ए–साइड फुटबल खेलमा वडा नं. ४ र वडा नं. ८ बीच कडा प्रतिस्पर्धा देखिएको थियो। दुवै टोलीले उत्कृष्ट खेल प्रदर्शन गरे तापनि अन्ततः वडा नं. ४ ले १–० गोल अन्तरले विजय हासिल गर्दै प्रतियोगितामा शानदार सुरुवात गरेको छ। खेलभरि दर्शकहरूको उत्साहजनक समर्थन र खेलाडीहरूको जोशले मैदान तातिएको थियो।

यस नगरस्तरीय खेलकुद महोत्सवले युवाहरूमा खेलप्रतिको आकर्षण बढाउने, स्वस्थ जीवनशैलीलाई प्रवर्द्धन गर्ने तथा समुदायबीच आपसी सद्भाव र सहकार्यलाई मजबुत बनाउने अपेक्षा गरिएको छ। आगामी दिनहरूमा विभिन्न खेल विधाहरूमा हुने प्रतिस्पर्धाले अझ रोचक मोड लिने विश्वास गरिएको छ। खेलकुद मात्र प्रतिस्पर्धा होइन, यो एकता, अनुशासन र भविष्य निर्माणको आधार हो — बुढानीलकण्ठले फेरि एकपटक यही सन्देश दिएको छ।