आर्थिक वर्ष ०८१/८२ को अन्तिम लेखापरीक्षण कार्य प्रारम्भ गर्ने विषयमा आज बुढानीलकण्ठ नगरपालिकामा प्रारम्भिक बैठक सम्पन्न भएको छ। बैठकमा सम्मानित महालेखापरीक्षकको कार्यालयबाट निर्देशक लेख प्रसाद लामिछानेको नेतृत्वमा नायव महालेखापरीक्षक घनश्याम काफ्ले, लेखापरीक्षण अधिकृत पार्वती भुसाल र राधिका चम्लागाईको टोली सहभागी भएको थियो। टोलीले आजदेखि औपचारिक रूपमा लेखापरीक्षण कार्य सुरु गर्ने जनाएको छ।

बैठकमा नगर प्रमुख मिठाराम अधिकारी, उपप्रमुख अनिता लामा, प्रमुख प्रशासकीय अधिकृत अजय वर्तौला, लेखा समिति संयोजक राजकाजी श्रेष्ठ, नगर प्रवक्ता नवराज भट्टराई, वडा नं. ११ का अध्यक्ष राजु अधिकारी लगायत सम्पूर्ण महाशाखा तथा शाखा प्रमुखहरूको उपस्थिति रहेको थियो।

नगर प्रमुख मिठाराम अधिकारीले लेखापरीक्षणलाई संस्थागत सुशासन र पारदर्शिता प्रवर्द्धन गर्ने महत्वपूर्ण अभ्यास भएको उल्लेख गर्दै नगरपालिकाको सम्पूर्ण खर्च र कार्यक्रमहरू कानूनी प्रावधानअनुसार पारदर्शी र उत्तरदायी हुने विश्वास व्यक्त गर्नुभयो। उहाँले विशेष गरी “बेरुजु घटाउने र आर्थिक शुद्धता कायम गर्ने दिशामा नगरपालिकाले निरन्तर प्रयास गर्ने” प्रतिबद्धता पनि व्यक्त गर्नुभयो।

उपप्रमुख अनिता लामाले नगरपालिकाले अगाडि सारेका नीति तथा कार्यक्रमलाई सफल बनाउन लेखापरीक्षणले देखाउने सुधारका क्षेत्रलाई आत्मसात गरी थप प्रभावकारी काम गर्ने बताउनुभयो। उहाँले पनि “बेरुजु व्यवस्थापनमा कटौती गरी उत्तरदायी निकायका रूपमा नगरपालिकाको विश्वसनीयता बढाउने” लक्ष्य राखिएको जानकारी दिनुभयो।

प्रमुख प्रशासकीय अधिकृत अजय वर्तौलाले महालेखापरीक्षकको टोलीलाई आवश्यक सम्पूर्ण सहयोग उपलब्ध गराइने उल्लेख गर्दै नगरपालिकाका सबै शाखा/महाशाखालाई तथ्यगत विवरण प्रस्तुत गर्न निर्देशन दिनुभयो।

लेखापरीक्षण यही भदौ महिनाको मसान्त सम्म सम्पन्न गरी नगरपालिकालाई प्रतिवेदन पेश गर्ने तयारी रहेको निर्देशक लेख प्रसाद लामिछानेले जानकारी दिनुभएको छ ।